Asal Usulipun Punapa Boten Wonten Kebo
Lanang Ing Pekalongan
Kala jaman rumiyin wonten ing dusun
Sigeseng wonteen patapa ingkang sakti mandraguna, asmanipun Ki Sadipo. Ki
Sadipo kagungan putra namung setunggal ingkang asma Joko Danu. Masyarakat
Sigeseng katahipun nyambut damel dados nelayan, sami ugi kaliyan Ki Sadipo lan
Joko Danu.
Wonten ing dusun Sigeseng Ki Sadipo
dipuntepangi minangka tiyang ingkang linuwih ilmunipun, lan Ki Sadipo ugi
prigel menawi damel kapal.pawartos ngenani kapinteranipun Ki Sadipo punika
ngantos dumugi Raja Galuh. Lajeng Raja Galuh dawuh supados dipundamelaken kapal
ingkang ageng lan sae dateng Ki Sadipo amargi badhe dipunginakaken kagem
ngubengi laut antawis kabupaten Pemalang Wetan pantai Sigeseng kaliyan
garwanipun.
Ki Sadipo bungah sanget pikantuk dawuhan
saking Raja Galuh, lajeng Ki Sadipo nyanggupi dawuhan punika, lan enggal-enggal
tindak menyang wana kaliyan murid-muridipun madosi kayu ingkang sae badhe dipundamel kapal
pesenanipun Raja Galuh. saksampunipun Ki Sadipo kepanggih wit ingkang ageng lan
dipunraos sae lajeng wit punika dipuntebang sareng-sareng kaliyan
murid-muridipun. Saksampunipun wit punika dipuntebang, wonten perkawis ingkang
dadosaken penggalih inggih punika wit ingkang sampun dipuntebang boten saged
dipunangkat. Amargi dinten punika sampun sonten, lajeng Ki Sadipo kaliyan
murid-muridipun sami wangsul sareng-sareng, lan kayu punika badhe dipunpundhut
benjangipun.
Joko
Danu punika kagungan ilmu ingkang
sakti, sami kados ta bapanipun. Joko Danu kagungan penggalih badhe biantu
bapanipun mindahaken kayu ingkang sampun dipuntebang kala wau. Ananging Joko
Danu punika kagungan watak ingkang awon
inggih punika remen sesumbar lan pamer kekuatanipun wonten ing ngajengipun
tiyang katah. Watak punika ingkang dadosaken bapanipun, Ki Sadipo boten purun
dipunkancani nalika badhe nebang wit wonten ing wana punika.
Nalika taksih peteng sakderengipun
srengenge munggah, Joko Danu tindak piyambak
wonten wana tanpa dipundawuhi bapanipun. Saksampunipun dumugi wana
punika Joko Danu sumerep kayu ingkang
sampun dipuntebang bapanipun kala wingi, lajeng Joko Danu punika migunakaken
kekuatanipun badhe mindahaken kayu
punika dumugi panggenan pandamelan kapal punika. Joko Danu punika rumaos
bangga amargi wonten mriku kathah warga ingkang
sumerep kekuatanipun Joko Danu.
Ki Sadipo midhanget pawartos menawi Joko
Danu sampun mindahaken kayu punika saking wana, lan Ki Sadipo ugi midhanget
sesumbaripun putranipun wonten ing ngajengipun para warga saengga dadosaken Ki
Sadipo murka lan ngucap sumpah menawi kekuatanipun Joko Danu punika kados ta
kebo lanang kemawon. Lajeng sanalika punika Joko Danu malih dados kebo lanang
werni cemeng, lan Ki Sadipo ngendika menawi kebo Danu punika bakal dados kebo
siluman ingkang manguwasani daerah Sigeseng ngantos pesisir wetan.
Wiwit prastawa punika masyarakat
Sigeseng lan sekitaripun boten wonten
ingkang gadah kebo lanang, nanging masyarakatipun boten gumun menawi wonten
kebo ingkang ngandut amargi sampun ngertos punika ulahipun lan lakunipun kebo
Danu.
